Stjórnendur Össurar selja hlutabréf

Forstjóri Össurar hf. og framkvæmdastjórar hafa selt stærstan hluta hlutabréfa sinna í félaginu, alls 23.441.801 hlut eða 5,6% af heildarhlutafé félagsins. Kaupandi hlutabréfanna er danska fjárfestingafyrirtækið William Demant Invest A/S, sem hefur verið stærsti hluthafi Össurar frá árinu 2005 og eykur við kaupin hlut sinn úr 34,3% af heildarhlutafé í 39,9%.

Fram kemur í tilkynningu frá Össuri, að stærstur hluti bréfanna, sem stjórnendurnir seldu, hafi upphaflega verið keyptur á hlutabréfamarkaði og fjármagnaður að nokkru leyti með lánsfé.  Bréfin eru seld til uppgjörs á þeim skuldum. Össur eða aðrir hluthafar félagsins hafi aldrei veitt stjórnendum lán eða ábyrgðir.

Í tilkynningunni segir, að  þessar eignabreytingar leiði ekki til skyldu til að gera yfirtökutilboð í hlutabréf annarra hluthafa, þar sem nýsamþykktar breytingar á yfirtökureglum laga um verðbréfaviðskipti hafi ekki formlega tekið gildi. Þá séu engar breytingar fyrirhugaðar á rekstri Össurar, hvorki á Íslandi né annarsstaðar, í kjölfar þessara viðskipta.
 
Jón Sigurðsson forstjóri Össurar, segir í tilkynningunni að þeir stjórnendurnir hafi ekki haft fjárhagslegt bolmagn til að halda hlutabréfunum. 

• 2 blogg um fréttina

Bloggað um fréttina

• Eggert Þór Aðalsteinsson: Stjórnendur selja á tombóluverði
• Guðmundur Óli Scheving: Danir kaupa ÖSSUR ehf. á tombóluverði !