Ráðin á skrifstofu fulltrúa IMF á Íslandi

Edda Rós Karlsdóttir, fyrrverandi forstöðumaður greiningardeildar Landsbankans, og Ragnar Hjálmarsson hafa verið ráðin til starfa á skrifstofu sendifulltrúa Alþjóðagjaldeyrissjóðsins (IMF) á Íslandi. Edda Rós mun starfa sem hagfræðingur en Ragnar verður skrifstofustjóri. Gengið var frá ráðningum þeirra í lok síðustu viku. Sendifulltrúi IMF á Íslandi er Franciszek Rozwadowski.

Samkvæmt upplýsingum frá skrifstofunni er ekki reiknað með að fleiri starfsmenn verði ráðnir.