Sala á Actavis lögð til hliðar

Ákveðið hefur verið að fresta fyrirhugaðri sölu á Actavis. Ástæðan er dræmar viðtökur hugsanlegra kaupenda þar sem uppsett verð upp á 5 milljarða evra, jafnvirði um 840 milljarða íslenskra króna, þykir of hátt, að því er segir í frétt Bloomberg-fréttastofunnar.

Actavis er í eigu Novators, fjárfestingarfélags Björgólfs Thors Björgólfssonar. Frá því var greint í febrúarmánuði síðastliðnum að Actavis væri til sölu. Þá kom fram að vonast væri eftir því að allt að sex milljarðar evra fáist fyrir samheitalyfjafyrirtækið.

Segir í frétt Bloomberg að hugsanlega verði aftur reynt að selja Actavis síðar á árinu, þegar aðstæður á fjármálamörkuðum hafa lagast. Þá kemur fram að Björgólfur Thor þurfi um 5 milljarða evra fyrir félagið, til að geta staðið skil á skuldum vegna þess.

Megin vandamálið eru skuldirnar, segir Leslie Itgen, greinandi hjá Bankhaus Lampe bankanum í Frankfúrt í samtali við Bloomberg. Hins vegar segir hann fyrirtækið vera gott.

Í frétt Bloomberg kemur fram að lyfjafyrirtækin Teva, Sanofi og Watson þyki hugsanlega hafa áhuga á kaupum á Actavis.

• 3 blogg um fréttina

Bloggað um fréttina

• Baldvin Jónsson: Markaðurinn hafnar gríðar hárri skráningu Actavis - engir kaupendur finnast
• Eggert Þór Aðalsteinsson: Var Actavis of dýru verði keypt?
• Einar Guðjónsson: Mafían vill meira