Eignir Kaupþings duga fyrir Edge

Nú liggur fyrir að eignir Kaupþings eru nægar til að gera upp við þýska innstæðueigendur sem áttu fé inni á Kaupthing-Edge netreikningunum. Jóhanna Sigurðardóttir forsætisráðherra tilkynnti þetta í framsögu sinni á ársfundi Seðlabanka Íslands rétt í þessu. Sagði hún þessa niðurstöðu vera mikið ánægjuefni.

Jóhanna sagði að heildarskuldir ríkisins yrðu nálægt 1.100 milljörðum króna í árslok 2009, en á móti kæmu miklar eignir. Neikvæð staða ríkissjóðs verði því um 150 milljarðar króna í lok árs 2009 ef spár ganga eftir. Hún varaði þó við því að brúttóskuldir ríkisins yrðu háar til skamms tíma vegna Icesave-skuldarinnar og vaxtagreiðslur háar.

Jóhanna sagði einnig, að eitt meginviðfangsefni stjórnvalda á næstu mánuðum og misserum sé að endurheimta traust.  Afar mikilvægt sé að Íslendingum takist að leysa Icesave-málið og ná hagstæðum samningum við erlend ríki sem hyggist veita okkur lánafyrirgreiðslu.

„Niðurstaðan hefur áhrif á skuldastöðu þjóðarbúsins og fólksins í landinu til frambúðar. Þetta er því eitt af stærstu viðfangsefnum okkar stjórnmálamanna, viðfangsefni sem því miður var áður of lengi frestað og ýtt á undan sér. Á því hefur orðið mikil breytingu, þessi mál hafa nú verið tekin markvissum og traustum tökum."

Ræða Jóhönnu í heild

• 4 blogg um fréttina

Bloggað um fréttina

• Páll Höskuldsson: Nei Jóhanna
• Magnús Helgi Björgvinsson: Jæja þá er einu færra að hafa áhyggjur af.
• Einar Guðjónsson: ´´Bankastjórnin´´ ríkisstjórn Vg og Samfylkingar stendur sig vel fyrir sína
• Guðjón Ó.: Ósannindi