Erfitt að standa undir skuldum

Erlendar skuldir og ábyrgðir ríkissjóðs nema nú um 2.649 milljörðum króna. Miðað við 5% vexti á þessum lánum er vaxtakostnaður á ári um 132,5 milljarðar króna. Kom þetta fram í máli Haraldar L. Haraldssonar, hagfræðings, á fundi Félags viðskipta- og hagfræðinga.

Segir hann afar hæpið að ríkið geti staðið undir slíkri skuldabyrði og spurði hvort ríkið sé að taka á sig ábyrgðir, sem ella hefðu átt að lenda á öðrum herðum. Árið 2004 hefðu erlendar skuldir þjóðarbúsins numið 1.663 milljörðum króna, en árið 2008 hefðu þær verið komnar í 12.887 milljarða, sem er 675% aukning. Stærstur hluti aukningarinnar skrifaðist á bankakerfið. Erlendar skuldir banka hefðu á sama tíma farið úr 1.220 milljörðum í 10.598 milljarða.

„Erlendar skuldir bankanna eru íslenska hagkerfinu ofviða," sagði Haraldur á fundinum. Leggur hann til að samið verði við kröfuhafa um afskriftir á hluta lánanna. Þá vill hann að erlendum skuldum fyrirtækja og heimila verði breytt í krónur á því gengi sem var þegar viðkomandi lán var tekið og það svo uppfært miðað við neysluverðsvísitölu.

• 3 blogg um fréttina

Bloggað um fréttina

• Helga Þórðardóttir: Hver er skuldasetning þjóðarinnar? Fjölmiðlar kannið málið.
• Jakob Þór Haraldsson: Vonlaust dæmi..!
• Magnús Sigurðsson: Eru hagfræðingarnir okkar í tilvistarkreppu?