Aðalmeðferð í máli Baldurs lokið

Aðalmeðferð í máli Baldurs Guðnasonar, fyrrverandi forstjóra Eimskips, á hendur Eimskipafélaginu lauk í Héraðsdómi Reykjavíkur fyrir stundu. Krefst hann rúmlega 1,1 milljónar evra í vangoldin laun frá félaginu, en það eru um 190 milljónir króna á gengi dagsins í dag.

Eimskip hefur neitað að greiða honum þessa upphæð, sem kveðið var á um í starfslokasamningi, m.a. vegna þess að forsendur samningsins hafi reynst rangar. Eins og fram hefur komið afskrifaði Eimskip um níu milljarða króna hlut sinn í Innovate um mitt síðasta ár, en í febrúar sama ár var ljóst að forsendur fyrir kaupum Eimskipa á breska félaginu voru brostnar.

Stjórnin beri ábyrgð

Á móti telur Baldur að hann verði ekki gerður ábyrgur fyrir því að einstakar fjárfestingar, sem hann hafi ráðist í meðan hann var forstjóri, hafi komið verr út en áætlað var. Stjórn Eimskips beri ábyrgð á öllum fjárfestingum vegna verkaskiptingar stjórnar og stjórnenda. Hann eigi því skýlausan rétt á því að Eimskip greiði honum umsamin laun. Á móti launakröfu launþega geti Eimskip aldrei haft neinar kröfur til skuldajöfnuðar nema með samþykki launþega, þ.e. Baldurs.

Í samtali við mbl.is sagði lögmaður Baldurs, Sigurður G. Guðjónsson, að niðurstöðu væri að vænta á næstu vikum, en að öðru leyti gæti hann lítið tjáð sig um málið.

• 5 blogg um fréttina

Bloggað um fréttina

• Einhver Ágúst: Mjög smekklegt
• Róbert Tómasson: Drullusokkur
• Guðmundur Pétursson: Þvílíkur auli þessi Baldur
• Einar Örn Einarsson: Hvílíkt og annað eins.
• Helgi Már Erlingsson: Timewarp