Yfirtökutilboð í Alfesca

Lur Berri Iceland ehf., sem er íslenskt einkahlutafélag í eigu franska félagsins Lur Berri Holding SAS, mun gera hluthöfum Alfesca hf. tilboð um að kaupa hluti þeirra í félaginu.

Fram kemur í tilkynningu, að í dag hafi Lur Berri Holding SAS, Kjalar Invest B.V., Alta Food Holding B.V., Kaupthing Singer & Friedlander Ltd.  og tilteknir stjórnendur Alfesca, þar á meðal forstjóri, fjármálastjóri og framkvæmdastjórar tiltekinna dótturfélaga Alfesca, gert  með sér samninga um stjórn og rekstur Alfesca.

Vegna samninganna er litið svo á að þessir samstarfsaðilar hafi með sér samstarf um stjórnun og rekstur Alfesca en þeir eiga samtals 67,44% af útgefnu hlutafé Alfesca og fara sameiginlega með 67,83% af atkvæðisrétti.

Enginn samstarfsaðilanna hyggst selja hlutabréf sín í tengslum við tilboðið og nær það því til annarra hluthafa. Einnig hefur Lur Berri Iceland fengið skuldbindandi yfirlýsingar frá hluthöfum, sem eiga 11,89% hlut í Alfesca og 11,96% af atkvæðisrétti, um að þeir muni samþykkja tilboðið.

Tilboðsverðið er 4,5 krónur í reiðufé fyrir hvern hlut í Alfesca en það er 32,4% hærra en síðasta viðskiptaverð á markaði í dag, sem var 3,4 krónur. Samkvæmt þessu er markaðsvirði Alfesca 26.450 milljónir króna.

• 2 blogg um fréttina

Bloggað um fréttina

• Einar Guðjónsson: Ólafur Ólafsson að enda flóttann
• Eggert Þór Aðalsteinsson: Alfesca á útleið