Viðskipti | mbl | 18.6.2009 | 15:09 | Uppfært 15:34

„Við létum þetta yfir okkur ganga“

Gylfi Magnússon. mbl.is/Eggert

Gylfi Magnússon viðskiptaráðherra segir að þjóðfélagið hafi allt of oft sætt sig við að fyrirtæki hafi starfað á gráu svæði.

„Líklega var það, sem helst fór úrskeiðis á undanförnum árum, að við sættum okkur alltof oft við það, að fyrirtæki væru á gráu svæði. Það var ekkert gert í því. Það var engin - kannski með örfáum undantekningum - sem stoppaði og sagði: „Þetta er óheilbrigt! Þarna er verið að fara mjög á svig við hinar og þessar reglur“,“ segir Gylfi á blaðamannafundi þegar ritið Stjórnarhættir fyrirtækja var kynnt í dag.

„Við létum þetta soldið yfir okkur ganga. Og með „við“ á ég við þjóðfélagið,“ bætir hann við.

Gylfa þykir mestu máli skipta að breyta þessu hugarfari og vill að aðhaldið komi frá viðskiptalífinu sjálfu. Slíkt aðhaldið felst meðal annars í því, að eiga ekki viðskipti við fyrirtæki sem starfi á gráu svæði.

Hann telur að það sé skilvirkasta aðhaldið.

Gylfi segir að þessi hugarfarsbreyting hjá þjóðfélaginu taki tíma; nokkur ár.

„Þessar tillögur [sem birtust í ritinu Stjórnarhættir fyrirtækja] eru bara fyrsta skrefið í þessari löngu vegferð,“ segir hann og vonar að þjóðin sé að fara í téða vegferð.

Ritið Stjórnarhættir fyrirtækja leit dagsins ljós í dag. Viðskiptaráð Íslands, Samtök Atvinnulífsins og Kauphöllin gefa leiðbeiningarnar út. Ritið var fyrst gefið út 2004 og var endurskoðað ári síðar.