7,4 milljarða afgangur

Í maímánuði voru fluttar út vörur fyrir 38,7 milljarða króna og inn fyrir 31,3 milljarða króna. Vöruskiptin í maí, reiknuð á fob verðmæti, voru því hagstæð um 7,4 milljarða króna. Er þetta í samræmi við bráðabirgðatölur, sem birtar voru í byrjun júní.

Hagstofan segir, að fyrstu fimm mánuði ársins hafi verið fluttar út vörur fyrir 171,1 milljarð króna en inn fyrir 146,9 milljarða króna. Afgangur var því á vöruskiptunum við útlönd, reiknað á fob verðmæti, sem nam 24,2 milljörðum en á sama tíma árið áður voru þau óhagstæð um 41,5 milljarða á sama gengi. Vöruskiptajöfnuðurinn var því 65,7 milljörðum króna hagstæðari en á sama tíma árið áður. 
 
Fyrstu fimm mánuði ársins 2009 var verðmæti vöruútflutnings 74,6 milljörðum eða 30,4% minna á föstu gengi en á sama tíma árið áður. Sjávarafurðir voru 44,1% alls útflutnings og var verðmæti þeirra 20,1% minna en á sama tíma árið áður. 

Útfluttar iðnaðarvörur voru 48,6% alls útflutnings og var verðmæti þeirra 27,1% minna en á sama tíma árið áður. Mestur samdráttur varð í verðmæti útflutnings iðnaðarvara, aðallega áls, en einnig var samdráttur í útflutningi á sjávarafurðum og skipum og flugvélum.

Fyrstu fimm mánuði ársins 2009 var verðmæti vöruinnflutnings 140,3 milljörðum eða 48,8% minna á föstu gengi en á sama tíma árið áður. Samdráttur varð í verðmæti nær allra liða innflutnings, mest í flutningatækjum, hrá- og rekstrarvöru og fjárfestingavöru.

• 1 blogg um fréttina

Bloggað um fréttina

• Jakobína Ingunn Ólafsdóttir: Dugir ekki fyrir vaxtgreiðslum