Viðskipti | mbl | 1.7.2009 | 12:04

Vaxtakjör ekki gefin upp

mbl.is/Ómar

Vaxtakjör langtímalánasamnings norrænu ríkjanna við Seðlabanka Íslands eru ekki gefin upp en skrifað var undir samninginn í morgun, að því er fram kemur í Morgunkorni Íslandsbanka. Líkt og greint var frá á mbl.is í morgun hljóðar samningurinn upp á 1,775 milljarða evra lán til 12 ára. Einungis þarf að greiða vexti af láninu fyrstu fimm árin.

Enn standa viðræður yfir viðræður við bæði Pólverja og Rússa um hugsanlega lánveitingu þessara aðila til íslenska ríkisins en ekkert er enn komið í höfn í þeim samningaviðræðum. Þá höfðu Færeyingar áður gengið frá 60 milljón dala láni sem þegar hefur verið afgreitt, samkvæmt Morgunkorni.

Langri bið lokið

Eftir margra mánaða bið hafa norrænu ríkin loksins lokið við að skrifa undir langtímalánasamning við íslenska Seðlabankann en nú er liðið á níunda mánuð síðan byrjað var að tala um lánveitinguna, samkvæmt Morgunkorni Íslandsbanka. Lánið verður notað til að styrkja gjaldeyrisvarasjóð Seðlabankans. Það verður greitt út í fjórum jöfnum greiðslum sem munu fylgja næstu endurskoðunum Alþjóðagjaldeyrissjóðsins.

Lánasamningurinn er á milli Íslands og Danmerkur, Finnlands og Svíþjóðar og milli Seðlabanka Íslands, með ábyrgð íslenska ríkisins, og Noregsbanka, með ábyrgð norska ríkisins, að því er segir í sameiginlegri tilkynningu frá stjórnvöldum á Norðurlöndunum.

Lánin eru veitt í tengslum við og til þess að styðja áætlun Íslendinga í samstarfi við Alþjóðagjaldeyrissjóðinn (AGS) sem hefur það að markmiði að koma á stöðugleika og umbótum í íslenskum efnahagsmálum. Lánunum er ætlað að efla gjaldeyrisvarasjóð Íslands. Þessi lán frá norrænu lánveitendunum fjórum, Danmörku, Finnlandi, Noregi og Svíþjóð, eru jafnframt mikilvægt framlag þeirra í viðleitni alþjóðasamfélagsins til þess að sigrast á alþjóðafjármálakreppunni, samkvæmt tilkynningu.

„Frá því forsætisráðherrar Norðurlanda ákváðu í lok október 2008 að skipa norrænan starfshóp Íslandi til stuðnings hafa Norðurlöndin átt náið samstarf um þetta viðfangsefni og fagna því nú að náðst hefur samkomulag um öll atriði samninganna.

Lánin sem eru til 12 ára leggja Íslandi til mikilvæga fjármögnun til langs tíma og sýna um leið samstöðu lánveitenda með Íslendingum og staðfastan langtímastuðning þeirra við Ísland í þeirri erfiðu stöðu í efnahags- og fjármálum sem nú er við að glíma.

Útborganir háðar AGS

Lánsféð verður ekki borgað út um leið og samningarnir hafa verið undirritaðir. Lánin verða borguð út í fjórum jöfnum hlutagreiðslum sem eru tengdar fjórum fyrstu endurskoðunum á efnahagsáætlun Íslands með AGS, og er hver greiðsla háð því að viðkomandi endurskoðun hafi verið samþykkt," að því er segir í sameiginlegri tilkynningu frá norrænu ríkjunum.

Ísland hefur skuldbundið sig til þess að framkvæma þá stöðugleika- og umbótaáætlun í efnahagsmálum sem samið hefur verið um við AGS. Í þessu sambandi eru samningar Íslendinga við Breta og Hollendinga um uppgjör skuldbindinga Íslands vegna Icesave-málsins mikilvægur áfangi, að því er segir í tilkynningunni.

„Framundan eru ákvarðanir í einstökum atriðum um áætlanir Íslendinga um aðgerðir til þess að koma á jafnvægi í fjármálum hins opinbera og um aðgerðir til þess að endurskipuleggja bankakerfið á sanngjarnan hátt, en þetta tvennt er mikilvægt fyrir framgang efnahagsáætlunarinnar.

Í samræmi við stefnu íslenskra stjórnvalda og AGS er nú unnið að undirbúningi frekari aðgerða á þessum sviðum sem nauðsynlegt er að verði ákveðnar áður en fyrsta endurskoðun efnahagsáætlunar Íslendinga með AGS fer fram, og fyrsti hluti norrænu lánanna verður borgaður út."