Viðskipti | mbl | 29.7.2009 | 11:14

Yfirlýsing frá Jóni Ásgeiri Jóhannessyni

Jón Ásgeir Jóhannesson Kristinn Ingvarsson

Jón Ásgeir Jóhannesson hefur sent frá sér yfirlýsingu þar sem hann segir að öll viðskipti milli Baugs Group og fjárfestingarfélagsins Gaums hafi verið á eðlilegu verði. Er yfirlýsingin send út í tilefni af frétt Morgunblaðsins í dag um skíðaskála Gaums í Courchevel í Frakklandi. Kaupin á skálanum voru fjármögnuð með láni frá Glitni, en skuldir Baugs við bankann námu 42 milljörðum króna þegar félagið fór í þrot.

„Í tilefni af fréttaflutningi Morgunblaðsins frá því í morgun varðandi hugsanlega riftun þrotabús Baugs Group hf. m.a. á „stórum skíðaskála í Frakklandi“ vill Jón Ásgeir Jóhannesson taka eftirfarandi fram:

Öll viðskipti milli Baugs Group hf. og Fjárfestingarfélagsins Gaums ehf. fyrir gjaldþrot Baugs Group hf. voru á eðlilegu verði, sem staðfest var af óháðum aðila.

Varðandi skíðaskálann sérstaklega þá var hann ekki fjármagnaður af Baugi Group hf. Þb. Baugs Group hf. á því ekkert tilkall til skálans og hefur skiptastjóri þrotabúsins staðfest það við mig munnlega í morgun. Hann staðfesti jafnframt að ummæli hans í Morgunblaðinu í dag um söluverðmæti skálans hefðu verið mistúlkuð.

Í frétt Morgunblaðsins er vísað til tölvupósts milli mín og lögmanns míns. Þær tölur sem koma fram í honum eru ekki réttar.

Morgunblaðinu hefði verið í lófa lagið að fá staðfest að enginn skíðaskáli í Frakklandi á þessu svæði er metinn á 36 milljónir evra. Tilgreindar fjárhæðir í tölvupóstinum standast því ekki og einsýnt að fiktað hefur verið póstinn. Morgunblaðið hefur ítrekað hótað að birta umræddan tölvupóst sem er stolinn og skrumskældur. Blaðamaður blaðsins hefur hringt í undirritaðan kófdrukkinn og hótað birtingu póstsins auk þess sem reynt hefur verið að kúga út úr mér fé gegn því að sleppt yrði að birta póstinn," að því er segir í yfirlýsingu frá Jóni Ásgeiri.

Aths. ritstj.

„Morgunblaðið telur umræddan tölvupóst áreiðanlega heimild og veit ekki til þess að átt hafi verið við tölur í honum.

„Hótanir" Morgunblaðsins og hringingar frá drukknum blaðamanni vegna þessa máls eru hugarburður Jóns Ásgeirs Jóhannessonar. Sama á við ef Jón Ásgeir gefur í skyn að Morgunblaðið hafi reynt að kúga út úr honum fé. Skiptastjóri þrotabús Baugs hefur enga athugasemd gert við það sem eftir honum er haft í frétt blaðsins og staðfesti raunar í samtali við blaðið að rétt væri eftir honum haft."