Viðskipti | mbl | 10.8.2009 | 10:20

Tókst að afstýra heimskreppu

Paul Krugman á ráðstefnu í Malasíu í morgun. Reuters

Bandaríski hagfræðingurinn Paul Krugman segir að tekist hafi að afstýra heimskreppu á borð við kreppuna miklu á þriðja og fjórða áratug síðustu aldar. Hins vegar muni það taka hagkerfi heimsins að minnsta kosti tvö ár að komast í samt lag eftir fjármálakreppuna undanfarin misseri.

Krugman sagði í ræðu á ráðstefnu í Kuala Lumpur í Malasíu í morgun, að fjármálakreppan hefði náð botninum en búast megi við að efnahagslíf um allan heim verði í hægagangi enn um sinn.

„Hvernig munum við komast út? Ég held að tæknilega svarið við því sé: Guð einn veit. Það skortir sárlega fyrirmyndir," sagði Krugman sem er prófessor í hagfræði við Princetonháskóla í Bandaríkjunum. Hann hlaut Nóbelsverðlaunin í hagfræði á síðasta ári.

Krugman sagði í ræðunni, að til þessa hafi efnahagsbati einkennst af því, að þau lönd, sem orðið hefðu fyrir barðinu á samdrætti ykju útflutning til landa sem hefðu mikinn afgang á utanríkisviðskiptum.

„En í þetta skipti verður ekki útflutningsdrifinn efnahagsbati nema við finnum aðra plánetu til að flytja vörur til. Þess vegna eigum við í miklum erfiðleikum.

Hann sagði að aðrar hugsanlegar lausnir, svo sem aukin einkaneysla, fjárfestingar í fyrirtækjarekstri og aukin fasteignasala virðist ekki eiga við um þessar mundir.

„Okkur virðist hafa tekist að forðast Kreppuna miklu 2.0," sagði Krugman, en bætti við: „Ég held ekki að efnahagskerfið þurfi að minnsta kosti 2 ár til að ná sér og líklega lengri tíma."