Danskur kylfingur ákærður fyrir skattsvik

Danski atvinnukylfingurinn Søren Hansen hefur verið ákærður í Danmörku fyrir stórfelld skattsvik en hann er grunaður um að hafa komið fjármunum undan í erlendum skattaskjólum. Hansen er í 47. sæti á heimslista kylfinga.

Að sögn fréttavefjar Jyllands-Posten krefst saksóknari efnahagsbrota í Danmörku þess, að Hansen greiði tæpar 20 milljónir danskra króna í sekt og verði einnig dæmdur til fangelsisvistar. Brotin, sem hann er ákærður fyrir, varða allt að 8 ára fangelsi.

Samkvæmt ákærunni hefur Hansen komið sér undan að greiða 9,7 milljónir danskra króna. Hann er með lögheimili í Mónakó en dönsk skattayfirvöld telja, að það sé aðeins yfirvarp og í raun hafi Hansen búið í sumarhúsi sínu í Hornbæk á Sjálandi. Með þessu móti hafi hann komið sér undan að greiða skatta af tekjum sínum í Danmörku á árunum 2000-2006.  Alls hefur Hansen fengið jafnvirði 55 milljóna danskra króna í verðlaunafé frá því hann varð atvinnumaður 1997 og að auki hefur hann haft háar auglýsingatekjur.

Hansen er nú að búa sig undir golfmót á PGA mótaröðinni í Minnesota í Bandaríkjunum um helgina en meðal annarra þátttakenda eru Tiger Woods og Phil Mickelson, tveir stigahæstu kylfingar heims.

• 1 blogg um fréttina

Bloggað um fréttina

• brahim: Danskur útrásarvíkingur