Hlutabréf snarhækka

Hlutabréf hafa hækkað mikið beggja vegna Atlantshafsins nú síðdegis og er það rakið til frétta, sem þykja benda til þess að helstu hagkerfin séu byrjuð að rétta úr kútnum eftir fjármálakreppuna.

Könnun, sem birt var í Evrópu í dag, sýnir að hagkerfi ríkjanna á evrusvæðinu virðast vera að ná jafnvægi á ný. Þá sagði Ben Bernanke, seðlabankastjóri Bandaríkjanna, að góðar horfur virtust vera fyrir hagkerfi heimsins. Tölur í Bandaríkjunum í dag sýndu einnig, að líf hefur færst í fasteignaviðskipti þar í landi. 

FTSE 100 hlutabréfavísitalan í Lundúnum hækkaði um 1,98% í dag, DAX vísitalan í Lundúnum um 2,86% og CAC vísitalan í París um 3,15%. Hér hækkaði Úrvalsvísitalan Kauphallar Íslands um 1,72.

Það sem af er viðskiptadegi í kauphöllinni á Wall Street hefur Dow Jones hlutabréfavísitalan hækkað um  1,6% og Nasdaq vísitalan um 1,4%.

• 1 blogg um fréttina

Bloggað um fréttina

• Andri Geir Arinbjarnarson: Rífandi uppgangur erlendis meðan allt er stopp hér.