Viðskipti | mbl | 11.10.2009 | 1:34 | Uppfært 7:35

Fyrstur til að fá stöðu grunaðs manns

Sigurður Einarsson.

Breska sunnudagsblaðið Observer segir, að Sigurður Einarsson, fyrrverandi stjórnarformaður Kaupþings, sé líklega fyrsti bankastjórnandinn í Evrópu sem fær stöðu stöðu grunaðs manns í rannsókn tengdri fjármálakreppunni.

Blaðið vísar til rannsóknar Ólafs Haukssonar, sérstaks saksóknara, á kaupum Mohameds Bin Khalifa Al-Thanis á rúmlega 5% hlut í Kaupþingi skömmu fyrir fall bankans.

Observer segir, að átta aðrir liggi undir grun í rannsókn sérstaks saksóknara, þar á meðal Hreiðar Már Sigurðsson, fyrrum forstjóri Kaupþings, og Ólafur Ólafsson, sem hafði milligöngu um kaup Al-Thanis í Kaupþingi. Einnig nefnir blaðið Halldór Bjarkar Lúðvígsson, fyrrverandi yfirmann lánasviðs Kaupþings, sem nú sér um norrænar eignir bankans fyrir skilanefnd Kaupþings. Observer segir að hugsanlegt sé að staða Halldórs verði endurskoðuð og hann fái síðar stöðu vitnis.

Sigurður býr í Chelsea í vesturhluta Lundúna.

Frétt Observer