CIT Group í greiðslustöðvun

Bandaríski bankinn CIT Group óskaði í kvöld eftir gjaldþrotavernd í samræmi við bandarísk gjaldþrotalög. Um er að ræða hliðstæðar aðgerðir og greiðslustöðvun samkvæmt íslenskum lögum en bankinn segir, að meirihluti lánardrottna hans hafi fallist á áætlun um endurskipulagningu rekstrarins sem m.a. feli í sér að skuldir verði lækkaðar um 10 milljarða dala.

CIT hefur átt  í miklum rekstarerfiðleikum allt þetta ár þrátt fyrir að hafa fengið 2,3 milljarða dala  fjárframlag úr opinberum sjóðum á síðasta ári. Þá fékk bankinn 4,5 milljarða dala neyðarlán í síðustu viku. 

CIT er einn stærsti lánveitandi til lítilla og meðalstórra fyrirtækja í Bandaríkjunum en talið er að um milljón slíkra fyrirtækja séu í viðskiptum við bankann. 

Um er að ræða eitt stærsta gjaldþrot í bandarískri fyrirtækjasögu. CIT er 101 árs gamalt fyrirtæki, sem hefur sérhæft sig í lánveitingum til fyrirtækja. Höfuðstöðvar bankans eru í New York.

Samkvæmt skjölum, sem lögð voru fyrir dómstól í New York í kvöld nema eignir bankans 71 milljarði dala en skuldir 65 milljörðum dala. 

• 1 blogg um fréttina

Bloggað um fréttina

• Jón Pétur Líndal: Meira af CIT Group bankanum og útliti kvenna í USA.