Viðskipti | mbl | 16.11.2009 | 12:49

Gengishækkun krónu rakin til breyttra reglnal

mbl.is/Heiðar

Greining Íslandsbanka segir, að breyttar reglur Seðlabankans um gjaldeyrismál, sem í raun feli í sér hert gjaldeyrishöft, skýri að gengi krónunnar hefur hækkað um 2% á millibankamarkaði frá því á fimmtudag. Hins vegar kunni þessar reglur að reynast skammgóður vermir.

Gengi krónunnar gagnvart evru er nú það sama og var í upphafi nóvember eða 183 krónur. Segir Íslandsbanki, að rekja megi gengishækkunina til þess, að ekki má lengur millifæra svonefndar aflandskrónur, þ.e. krónur á reikningum erlendra fjármálastofnana í hérlendum bönkum, yfir á innlenda reikninga.

Þetta hefur það í för með sér, að þeir sem vilja ganga á svig við gjaldeyrishöftin geta ekki lengur keypt gjaldeyri innanlands, selt hann á aflandsmarkaði við mun hærra krónuverði en gildir hér innanlands, og nýtt þær krónur að nýju hér á landi. Það sama gildir raunar um þá sem hafa haft undanþágur frá banni við fjármagnshreyfingum milli landa.

Greining Íslandsbanka segir, að þessar breytingar gætu stutt nokkuð við gengi krónu til skemmri tíma litið. Hins vegar megi velta fyrir sér hvaða skilaboð það sendi umheiminum að Seðlabankinn skuli ítrekað þurfa að herða á gjaldeyrishöftunum þrátt fyrir yfirlýsingar í aðgerðaráætlun Alþjóðagjaldeyrissjóðsins og stjórnvalda um að slíkt yrði ekki gert.

„Það hjálpar heldur ekki hversu gjaldeyrisreglurnar eru flóknar og túlkun Seðlabankans sjálfs á þeim á tíðum óljós. Nægir þar að nefna „túlkun" bankans á reglunum í maí sem var á þá lund að ekki mætti kaupa gjaldeyri fyrir gengishagnað af skuldabréfum, aðeins nokkrum vikum eftir að hið gagnstæða hafði verið fullyrt í Peningamálum bankans. Það er ekki í öllu falli vel til þess fallið að laða erlenda fjárfesta að landinu þegar þeir þurfa að glíma við flókið og á köflum óljóst regluverk í gjaldeyrismálum, sem ofan í kaupið hefur ítrekað verið breytt undanfarið ár. Þessi síðasta herðing Seðlabankans á gjaldeyrishöftunum gæti því reynst skammgóður vermir, því þótt til skemmri tíma fáist með henni betri stjórn á gjaldeyrisflæði til og frá landinu er hún til þess fallin að minnka enn traust umheimsins á krónunni sem nothæfum gjaldmiðli í alþjóðlegum viðskiptum," segir Íslandsbanki í Morgunkorni sínu.