Raunvirði íbúða nú það sama og 2004

Íbúðaverð á höfuðborgarsvæðinu er nú svipað og það var í ársbyrjun 2007 en að raunvirði er það nær því sem það var í árslok 2004. Greining Íslandsbanka segir, að lækkunin endurspegli þann mikla samdrátt sem eigi sér nú stað á íbúðamarkaði sem og í hagkerfinu öllu.

Íbúðaverð á höfuðborgarsvæðinu lækkaði um 0,1% milli september og október samkvæmt vísitölu íbúðaverðs sem Fasteignaskrá Íslands tekur saman og birti í gær. Að nafnvirði hefur íbúðaverð lækkað um 10% síðustu 12 mánuði en um 21% að raunvirði miðað við vísitölu neysluverðs án húsnæðis.

Greining Íslandsbanka segir í Morgunkorni sínu, að frá því að íbúðaverð á höfuðborgarsvæðinu náði toppi í byrjun síðasta árs hafi það lækkað um 12,2% að nafnvirði og um þriðjung að raunvirði. Þessi þróun sé þó ekkert einsdæmi þar sem á sama tíma hafi íbúðaverð lækkað í nágrannalöndunum þótt raunverðslækkunin hafi þó verið einna mest hér á landi.

Íslandsbanki segir, að reikna megi með að frekari lækkun á íbúðaverði sé óhjákvæmileg þó að mesta lækkunin sé að öllum líkindum yfirstaðin.

• 1 blogg um fréttina

Bloggað um fréttina

• Víðir Hallgrímsson: Raunverð en og aftur