Hóta Glitni lögsókn

Bresk sveitar- og bæjarfélög hóta því að höfða mál gegn Glitini en sveitarfélögin óttast að fá ekki nema brot af því sem þau áttu inni á reikningum bankans þegar hann fór í þrot haustið 2008. Kröfur þeirra eru ekki metnar sem forgangskröfur í bú Glitnis en þær eru metnar sem forgangskröfur hjá Landsbankanum, samkvæmt frétt í Financial Times.

Bresk sveitar- og bæjarfélög hóta því að höfða mál gegn íslensku bönkunum en sveitarfélögin óttast að fá ekki endurgreiddar 150 milljónir punda, 31 milljarð króna, sem þau áttu inni á innlánsreikningum bankanna er þeir hrundu haustið 2008. Bresk sveitarfélög áttu alls 900 milljónir punda, 184 milljarða króna, á reikningum í íslensku bönkunum, samkvæmt frétt viðskiptablaðsins Financial Times.

Bæjar- og sveitarfélög hafa fengið um 100 milljónir punda endurgreiddar frá íslensku  bönkunum en gert er ráð fyrir frekari endurgreiðslum í vor.

Alls voru 217 milljón pund inni á reikningum Glitnis. Er óttast að einungis 30% fáist upp í þær kröfur þar sem kröfur sveitarfélaganna flokkast ekki sem forgangskröfur í búið.

Stephen Jones, fjármálastjóri sambands sveitarfélaga í Bretlandi, mun mæta á kröfuhafafund í Reykjavík á fimmtudag til þess að fjalla um málefni sveitarfélaganna samkvæmt frétt FT.

Segir FT að í síðasta mánuði hafi krafa sveitarfélaga á Landsbankann verið skilgreind sem forgangskrafa en alls áttu þau 414 milljónir punda á reikningum Landsbankans. Það þýði að þau fái innistæður sínar nánast að fullu endurgreiddar.

Hótar samband sveitarfélaga að höfða mál gegn íslensku bönkunum ef einungis 25-30% fást upp í kröfur þeirra. Haft er eftir Steinunni Guðbjartsdóttur, stjórnarformanni slitastjórnar Glitnis, að hún eigi alveg eins von á því að bresku sveitarfélögin reyni að fá ákvörðuninni hnekkt fyrir dómstólum. Hún segir ástæðuna fyrir því að kröfurnar séu ekki forgangskröfur vera þá að samkvæmt íslenskum lögum séu þau ótryggð.

Sjá nánar umfjöllun FT hér

• 1 blogg um fréttina

Bloggað um fréttina

• Jakob Falur Kristinsson: Málsókn