Saab lokað

Bandaríski bílaframleiðandinn General Motors hefur ákveðið að leggja niður sænska dótturfélagið Saab Automobile  eftir að viðræður við hollenska bílaframleiðandann Spyker fóru út um þúfur í dag. Gert er ráð fyrir að síðasti Saab bíllinn komi af færibandinu í verksmiðju félagsins í Trollhättan í lok mars.

Fram kemur í frétt Reutersfréttastofunnar, að GM hafi ákveðið að leysa fyrirtækið upp og greiða kröfuhöfum. Í kjölfar þessara frétta lækkaði gengi hlutabréfa Spyker um 13% í hollensku kauphöllinni.

GM hafði fyrr á árinu gert samning við sænska sportbílaframleiðandann Koeningsegg Group um að kaupa Saab en þegar til átti að taka tókst Koeningsegg ekki að tryggja fjármögnun kaupanna. Síðan hefur GM átt í viðræðum við Spyker sem nú hefur verið hætt.  

Kínverski bílaframleiðandinn BAIC keypti í byrjun vikunnar framleiðslurétt á tækni og búnaði frá Saab fyrir jafnvirði um 25 milljarða íslenskra króna.  

• 1 blogg um fréttina

Bloggað um fréttina

• Ægir Óskar Hallgrímsson: Og 3500 manns missa vinnuna??