Arion banki segir líklega nei

Ljóst er að tugi milljarða króna þarf til í nýju fjármagni inn í 1998 ehf., eignarhaldsfélagið sem á Haga, til þess að rekstur félagsins standi undir sér. Hann þarf einnig að standa undir lánum sem hvíla á 1998 ehf., félaginu sem á Haga, sem eru nú nánast að fullu í eigu Arion banka.

Það er nú á borði Arion banka að ákveða hvernig framtíðareignarhaldi á 1998 ehf. og Högum verður háttað, en samkvæmt heimildum Morgunblaðsins verður fjallað um tilboð þeirra Jóns Ásgeirs Jóhannessonar og Jóhannesar Jónssonar á fundi í Arion banka næsta mánudag. Samkvæmt sömu heimildum munu þeir Jón Ásgeir og Finnur Árnason mæta á þann fund.

Útilokað er talið að bankinn gangi að tilboði þeirra feðga óbreyttu, þar sem margt mun þykja óljóst um það hvernig þátttaka erlendra fjárfesta í kaupunum á í raun að verða og í hve miklum mæli. Sömu heimildir herma að bankinn telji tilboðið ekki slæmt, en það þurfi einfaldlega margt að skýra og setja ákveðnar tryggingar fyrir greiðslugetu.

Óbærileg skuldastaða

Skuldir 1998 ehf. í dag eru a.m.k. 50 milljarðar króna, að því gefnu að engar skuldir félagsins hafi verið afskrifaðar í gamla Kaupþingi, og skuldir Haga, samkvæmt nýjustu upplýsingum sem fyrir liggja, en þær eru úr árshlutareikningi félagsins frá því 31. ágúst 2008, eru um 22 milljarðar króna. Samtals eru því skuldir félaganna yfir 70 milljarðar króna og hefur þá ekkert tillit verið tekið til þess, hversu mikið skuldir Haga hafa hækkað á undanförnu einu og hálfu ári, en ljóst er að þær hafa hækkað umtalsvert, rétt eins og skuldir annarra fyrirtækja í landinu.

Öll lán hækkuðu við gengisfall

Við gengisfall krónunnar í október 2008 varð mikil hækkun allra áhvílandi lána í atvinnurekstri og þar eru 1998 og Hagar að sjálfsögðu ekki undanskilin.

Á sama tíma rýrnuðu flestar eignir mjög í verði, bæði fasteignir og aðrar eignir, og líklega rýrnuðu óefnislegar eignir (viðskiptavild) hvað mest, en samkvæmt ársreikningum Haga hafa óefnislegar eignir jafnan verið stór hluti af eignum félagsins.

Vilja fresta sölu Haga

Nokkur fjöldi stórra kröfuhafa Kaupþings er sagður vilja fresta sölunni á Högum og jafnvel setja fyrirtækið í opið söluferli, enda um að ræða stærstu eign bankans. Einhverjir kröfuhafa hafa komið að máli við Brynjar Níelsson, lögmann Þjóðarhags, sem lýst hefur yfir áhuga á að kaupa Haga. Kröfuhafarnir sem um ræðir telja það geta veikt stöðu bankans ef Hagar yrðu seldir fyrri eigendum. Þeir telja að óánægja gæti orðið meðal viðskiptavina Arion ef eignir yrðu seldar aðilum sem áður höfðu misst þær út úr höndunum.