Ný stjórn mun ráða bankastjóra

Elín Jónsdóttir, forstjóri Bankasýslu ríkisins, segir að það verði nýrrar stjórnar ríkisbankans NBI að ráða bankastjóra í stað Ásmunds Stefánssonar. 

Ekki hefur verið haldinn aðalfundur vegna uppgjörs NBI fyrir síðasta hluta ársins 2008, eftir að bankinn var stofnaður. Reiknað er með að fundurinn verði haldinn í næstu viku.

Að sögn Elínar er áætlað að ný stjórn verði kosin þar, en Bankasýsla ríkisins mun útnefna fjóra menn af fimm í stjórnina. Fimmta manninn mun eignarhaldsfélag skilanefndar Landsbankans tilnefna, en skilanefndin á 18,7% í bankanum á móti ríkinu. 

Elín segir að valnefnd á vegum Bankasýslunnar muni tilnefna 2-3 einstaklinga í hvert stjórnarsæti í NBI.  Afrakstur vinnu valnefndarinnar verður ljós fljótlega. Nýja stjórnin mun síðan, eins og áður sagði, auglýsa eftir nýjum bankastjóra.

Reiknað er með að aðalfundur NBI fyrir árið 2009 verði haldinn í apríl á þessu ári, en ekki er víst hvort að ráðningu nýs bankastjóra verði lokið þá.

• 1 blogg um fréttina

Bloggað um fréttina

• Gunnlaugur H Gunnlaugsson: SEGIR LÌTID en..