Fiskafli í janúar minni en í fyrra

Heildarafli íslenskra skipa í nýliðnum janúarmánuði, metinn á föstu verði, var 8,9% minni en í janúar 2009. Að sögn Hagstofunnar nam aflinn alls 55.445 tonnum í janúar 2010 samanborið við 71.520 tonn í janúar 2009. 

Botnfiskafli dróst saman um rúm 1700 tonn frá janúar 2009 og nam 31.300 tonnum. Þar af nam þorskaflinn rúmum 17.400 tonnum, sem er aukning um 1700 tonn frá fyrra ári. Ýsuaflinn nam rúmum 5400 tonnum sem er um 1400 tonnum minni afli en í janúar 2009. Karfaaflinn dróst saman  um 1200 tonn samanborið við janúar 2009 og nam tæpum 2400 tonnum. Um 2700 tonn veiddust af ufsa sem er um 600 tonnum minni afli en í janúar 2009.

Afli uppsjávartegunda nam rúmum 22.000 tonnum sem er tæplega 14.500 tonnum minni afli en í janúar 2009. Hagstofan segir, að samdrátt í uppsjávarafla megi helst rekja til minni síldarafla en 6400 tonn veiddust af síld í janúar samanborið við 18.500 tonna afla í janúar 2009. Kolmunnaafli nam 5300 tonnum og dróst saman um 8000 tonn frá fyrra ári. Afli gulldeplu nam 10.600 tonnum sem er aukning um tæp 5700 tonn miðað við janúar 2009.

Flatfiskaflinn var 1397 tonn í janúar 2010 og dróst saman um 248 tonn frá fyrra ári. Skel- og krabbadýraafli nam 340 tonnum samanborið við um 57 tonna afla í janúar 2009.

• 1 blogg um fréttina

Bloggað um fréttina

• Grétar Mar Jónsson: Minni gjaldeyristekjur