Viðskipti | mbl | 5.3.2010 | 9:00 | Uppfært 10:10

Samdrátturinn var 6,5%

Landsframleiðsla dróst saman að raungildi um 6,5% á árinu 2009 samkvæmt tölum sem Hagstofan birti í dag. Er þetta mesti samdráttur sem mælst hefur frá því að gerð þjóðhagsreikninga hófst á Íslandi árið 1945 en þó minni en spár gerðu ráð fyrir um tíma og raunar mældist 3,3% hagvöxtur milli 3. og 4. ársfjórðungs en landsframleiðsla á síðasta fjórðungi ársins var 9,1% minni en hún var á sama tímabili árið 2008. Mesti samdráttur sem áður hefur mælst hér á landi nam 5,5% árið 1968 þegar síldin hvarf.

Samdrátturinn hér á landi var þó meiri en að meðaltali í OCED-rikjunum en hann var 3,5%. Hagstofan segir, að þetta sé í annað skiptið á tímabilinu 1997–2009 að hagvöxtur hér á landi sé minni en í OECD-ríkjum en það gerðist einnig á árinu 2002 þegar vöxturinn var um 0,1% samanborið við 1,7% vöxt hjá OECD-ríkjunum í heild.

Samfelldur hagvöxtur hafði fram að þessu verið frá og með árinu 1993 en hagvöxtur á árinu 2008 er talinn hafa verið 1%.

Hagvöxtur á fjórða ársfjórðungi

Hagstofan segir, að landsframleiðsla sé talin hafa vaxið um 3,3% að raungildi frá 3. til 4. ársfjórðungs 2009. Á sama tíma jukust þjóðarútgjöld um 2,7% þar sem einkaneysla jókst um 1,4 % og fjárfesting um 16,6%. Samneysla dróst saman um 1,1% milli 3. og 4. ársfjórðungs. Þá er talið að útflutningur hafi vaxið um 3% en innflutningur um 1,5%.

Á síðasta ári varð samdráttur í öllum þáttum þjóðarútgjalda, sem í heild drógust saman um 20,1%. Einkaneysla dróst saman um 14,6%, samneysla um 3% og fjárfesting um 49,9%. Aftur á móti jókst útflutningur um 6,2% á sama tíma og innflutningur dróst saman um 24%.

Hagstofan segir, að þessi þróun hafi valdið því að verulegur afgangur varð af vöru- og þjónustuviðskiptum á árinu 2009, 120 milljarðar króna, borið saman við 42 milljarða króna halla árið áður. Þessi mikli bati varð til þess að samdráttur landsframleiðslu varð mun minni en nam samdrætti þjóðarútgjalda.

Landsframleiðsla 2009

Landsframleiðslan á 4. ársfjórðungi 2009