7,6% atvinnuleysi

Á fyrsta ársfjórðungi 2010 voru að meðaltali 13.600 manns án vinnu og í atvinnuleit eða 7,6% vinnuaflsins. Atvinnuleysi mældist 9,4% hjá körlum og 5,7% hjá konum. Þegar litið er til aldurs var atvinnuleysið mest meðal fólks á aldrinum 16-24 ára, eða 16,4%.

Að sögn Hagstofunnar, sem heldur utan um þessar upplýsingar, fjölgaði atvinnulausum um 900 manns frá fyrsta ársfjórðungi 2009 til sama tímabils 2010.  Þá mældist atvinnuleysi 8,6% á höfuðborgarsvæðinu en 5,9% utan þess.

Þeir sem hafa verið atvinnulausir í 12 mánuði eða lengur eru skilgreindir sem langtímaatvinnulausir. Á fyrsta ársfjórðungi 2009 höfðu um 2.500 manns verið atvinnulausir svo lengi, eða um 18,1% atvinnulausra, en voru á sama tímabili 2009 um 600 manns. 

Starfandi fólki fækkar

Fjöldi starfandi á fyrsta ársfjórðungi 2010 var 163.900 manns og fækkaði um 1.600 frá sama tíma ári áður. Á vinnumarkaði voru alls 177.500 manns sem jafngildir 79,7% atvinnuþátttöku. Atvinnuþátttaka karla var 83,4% og kvenna 76%. 

Á fyrsta ársfjórðungi 2009 voru alls 178.200 á vinnumarkaði og atvinnuþátttaka mældist 79,5%. Atvinnuþátttaka karla var 83,3% og kvenna 75,5%.

Vinnutími 39 stundir

Á fyrsta ársfjórðungi 2010 var meðalfjöldi vinnustunda 39 klst. hjá þeim sem voru við vinnu í viðmiðunarvikunni, 43,3 klst. hjá körlum en 34,2 klst. hjá konum. Meðalfjöldi vinnustunda hjá þeim sem voru í fullu starfi var 44,8 klst. en 22,4 klst. hjá þeim sem voru í hlutastarfi.

Á fyrsta ársfjórðungi 2009 var meðalfjöldi vinnustunda 38,9 klst., 43,3 klst. hjá körlum en 34 klst. hjá konum. Þeir sem voru í fullu starfi unnu 44,7 klst. að jafnaði en þeir sem voru í hlutastarfi unnu að jafnaði 21,4 klst.

• 1 blogg um fréttina

Bloggað um fréttina

• Páll Vilhjálmsson: 7,6% atvinnuleysi hér, 10 % í ESB