Staða þjóðarbúsins verri en opinberar tölur sýna

Opinberar tölur Seðlabanka Íslands vanmeta neikvæða hreina erlenda stöðu þjóðarinnar, þ.e. skuldir þjóðarbúsins umfram eignir. Samkvæmt minnisblaði Seðlabankans frá 18. desember mun neikvæða staðan nema 91% af vergri landsframleiðslu í árslok 2010, en opinberar tölur Seðlabankans gefa hins vegar til kynna að hún sé neikvæð um 28%. Þetta kemur fram í grein Oddgeirs Ottesens hagfræðings, sem birtist í blaðinu í dag.

Gylfi Magnússon, efnahags- og viðskiptaráðherra, hefur undanfarið haldið fyrirlestra, þar sem hann hefur borið saman hreina erlenda stöðu Íslands og annarra ríkja. Þar hefur hann byggt á opinberum tölum Seðlabanka Íslands, sem gefa sem fyrr segir til kynna að staðan sé neikvæð um 28%. Gylfi setti ekki fram neina fyrirvara um minnisblað Seðlabankans frá því í desember.

Í fyrirlestri sínum í Háskóla Íslands 25. mars sl. sagði Gylfi:

„Staða þjóðarbúsins í heild er furðu lík [stöðunni fyrir hrunið]. Hvort sem við horfum á skuldir þjóðarbúsins, vergar eða hreinar, eða eignastöðu hins opinbera, verga eða hreina. Í grundvallaratriðum eru hagtölur mjög nærri því sem þær voru fyrir hrun.“

Þegar þetta var borið undir Gylfa svaraði aðstoðarmaður hans því til að eins og blaðamaður benti á hefði ráðherra miðað við opinberar tölur frá Seðlabankanum. „Í fyrirlestrunum sem þú vísar til hefur ráðherra reyndar lagt áherslu á að þessi tala muni fyrirsjánlega taka miklum breytingum m.a. með uppgjöri á þrotabúum bankanna.

Sjá nánar ítarlega umfjöllun um þetta málí viðskitpablaði Morgunblaðsins í dag.