Miklar hækkanir á mörkuðum

Helstu hlutabréfavísitölur hafa hækkað mikið í morgun eftir að tilkynnt var um stofnun neyðarsjóðs til bjargar illa stöddum evru-ríkjum. Í París hefur CAC vísitalan hækkað um 7,93%, DAX í Frankfurt hefur hækkað um 4,31% og FTSE í Lundúnum um 4,45%.

Seðlabanki Evrópu kynnti í dag áætlun um að kaupa opinberar skuldir evruríkja en það er hluti þeirrar áætlunar sem leiðtogar og fjármálaráðherrar aðildarríkja Myntbandalags Evrópu samþykktu um helgina.

Í Hong Kong hækkaði Hang Seng vísitalan um 2,64%, Nikkei í Japan hækkaði um 1,6% og í Shanghai hækkuðu hlutabréf einnig í dag.

Alls verður stofnaður neyðarsjóður upp á 750 milljarða evra. 440 milljarðar evra koma frá evru-ríkjunum sextán, 60 milljarðar frá neyðarsjóði ESB og 250 milljarðar evra koma frá Alþjóða gjaldeyrissjóðnum.

Í minnisblaði sérfræðings hjá Royal Bank of Scotland kemur fram að björgunarpakkinn sé sá stærsti í sögunni til þess að styðja við bakið á Evrópu. Þetta sé jafnvel meiri stuðningur heldur en fólst í Marshall áætluninni eftir stríð ef tekið er tillit til verðbólgu.