Verðbólgan mælist 7,5%

Vísitala neysluverðs miðuð við verðlag í maí hækkaði um 0,41% frá apríl. Vísitala neysluverðs án húsnæðis hækkaði  um 0,29% frá apríl.
Síðastliðna 12 mánuði hefur vísitala neysluverðs hækkað um 7,5% en vísitala neysluverðs án húsnæðis um 10,1%.

Kostnaður vegna eigin húsnæðis hækkaði um 1,2% (vísitöluáhrif 0,15%) á milli apríl og maí, þar af voru áhrif af hækkun markaðsverðs 0,18% en af lækkun raunvaxta -0,03%. Verð á flugfargjöldum til útlanda hækkaði  um 9,8% (0,10%) á sama tímabili en verð dagvara lækkaði um 0,6% (-0,11%).

Undanfarna þrjá mánuði hefur vísitala neysluverðs hækkað um 1,2% sem jafngildir 5,0% verðbólgu á ári (6,6% fyrir vísitöluna án húsnæðis), að því er segir í frétt á vef Hagstofu Íslands.

Verðbólgan mæld á tólf mánaða tímabili hefur heldur minnkað milli mánaða en í apríl var hún 8,3%. Hækkun vísitölu neysluverðs milli mánaða er talsvert meiri en spáð hafði verið. Greining Íslandsbanka spáði 0,2% hækkun og MP banki spáði 0,1% hækkun.

• 2 blogg um fréttina

Bloggað um fréttina

• Eyjólfur Jónsson: Getur það varið?
• Haukur Gunnarsson: Ekki getur ríkisstjórnin tekist á við verðbólguna frekar en annað.