Öskuvari á vélar easyJet

Enska lággjaldaflugfélagið easyJet segist ætla að búa flugvélar sínar með sérstökum skynjurum sem nemi hvort eldfjallaaska er í loftinu. Félagið segir, að þessir öskuvarar séu þeir fyrstu sinnar tegundar og gætu komið í veg fyrir á ástand, á borð við það sem varð í apríl, skapist á ný en þá lagðist flug að mestu niður í Evrópu vegna öskuskýs frá Eyjafjallajökli.

Flugfélagið ætlar að verja um 1 milljón punda, jafnvirði um 188 milljóna króna, í að þróa og prófa öskuvarann í samvinnu við flugvélaframleiðandann Airbus. Verður búnaðurinn settur í um tug flugvéla easyJet í lok ársins til reynslu. 

Búnaðurinn, sem nefndur er AVOID, byggir á innrauðri myndavél sem sendir myndir bæði til flugmanna og flugstjórnarmiðstöðvar easyJet. Geta flugmenn þannig séð öskuský  í flughæð á bilinu frá 5 þúsund til 50 þúsund feta.  

Talið er að tjón flugfélaga vegna flugbannsins í apríl nemi yfir 1 milljarði evra, jafnvirði 160 milljarða króna, og tengd þjónusta hafi tapað yfir 1,5 milljörðum evra. Milljónir farþega urðu strandaglópar. 

• 3 blogg um fréttina

Bloggað um fréttina

• Ómar Ragnarsson: Tæknin hlýtur að koma til skjalanna.
• Ólafur Gíslason: Raunverulegt eða til að friða farþega?
• Haraldur Haraldsson: Öskuvari á vélar easyJet///þetta mjög svo gott mál í framtið,öryggið …