Hleranir í Exetermáli

Símar margra þeirra sem liggja undir grun um að hafa brotið af sér í aðdraganda efnahagshrunsins hafa verið hleraðir af lögregluyfirvöldum. Samkvæmt heimildum Morgunblaðsins hefur slíkum hlerunum m.a. verið beitt við rannsókn á Exeter-málinu svokallaða.

Herma heimildir Morgunblaðsins að í ákveðnum tilvikum hafi hleranirnar staðið yfir svo mánuðum skipti, að því er fram kemur í umfjöllun um þessi mál í viðskiptablaði Morgunblaðsins í dag.

Í lok júní voru gefnar út ákærur á hendur þeim Jóni Þorsteini Jónssyni, Ragnari Z. Guðjónssyni og Styrmi Þór Bragasyni vegna lánveitingar Byrs sparisjóðs til Exeter Holding til kaupa á stofnfjárbréfum í Byr.

Ólafur Þór Hauksson, sérstakur saksóknari, vildi ekki tjá sig um það hvaða rannsóknarúrræðum embættið hefði beitt í ákveðnum málum, en vísaði til heimilda í lögum um rannsókn sakamála.