Spá frekari lækkun stýrivaxta

Greining Íslandsbanka spáir því að  peningastefnunefnd Seðlabankans ákveði að lækka stýrivexti bankans um 0,50 prósentustig á næsta vaxtaákvörðunardegi, þann 18. ágúst næstkomandi. Við þetta lækka vextir á viðskiptareikningum innlánsstofnana í 6% og vextir á lánum gegn veði til sjö daga í 7,5%.

Heldur Seðlabankinn þar með áfram vaxtalækkunarferli sínu en við síðustu vaxtaákvörðun peningastefnunefndarinnar 23. júní síðastliðinn ákvað nefndin að lækka vexti um 0,5 prósentur, segir í Morgunkorni Íslandsbanka.

„Má geta þess að þá vildu tveir af fimm nefndarmönnum taka aðra ákvörðun og lagði annar til 0,25 prósentna vaxtalækkun og hinn 0,75 prósentna lækkun. Sá sem vildi meiri lækkun hélt því fram að best væri að bregðast við áhrif gjaldeyriskreppunnar með gjaldeyrishöftum og nota lægri vexti til að bregðast við fjármagnskreppunni," segir í Morgunkorni.

Gengi krónunnar er nú nánast hið sama og það var við vaxtaákvörðun nefndarinnar 23. júní síðastliðinn. Verðbólgan hefur hins vegar haldið áfram að hjaðna og ögn hraðar en reiknað var með. Við síðustu vaxtaákvörðun stóð verðbólgan í 7,5% en er nú 4,8%. Þegar ekki er tekið tillit til áhrifa óbeinna skatta minnkaði verðbólgan á þessu tímabili úr 6,1% niður í 4,0%. Líkur eru á því að verðbólgan hjaðni hratt á næstunni og má reikna með því að hún verði komin niður í  2,5% verðbólgumarkmið Seðlabankans fyrir mitt næsta ár og fyrr ef frá eru talin áhrif óbeinna skatta, samkvæmt áliti Greiningar Íslandsbanka.

„Enn ríkir talsverð óvissa um hvaða áhrif dómar hæstaréttar munu hafa á hið íslenska fjármálakerfi. Hefur Seðlabankinn og Fjármálaeftirlitið gefið út leiðbeinandi tilmæli til fjármálafyrirtækja vegna gengistryggðra lána. Einnig hefur fallið dómur í héraði um að samningsvextir á gengistryggðu láni standi ekki áhaggaðir án gengistryggingarinnar. Þeim dómi hefur verið áfrýjað til Hæstaréttar. Því ríkir enn talsverð óvissa um niðurstöður þessa máls sem mun ná fram yfir næsta vaxtaákvörðunardag. 

Reikna má fastlega með því nú að peningastefnunefndin endurtaki yfirlýsingu sína um að haldist gengi krónunnar stöðugt eða styrkist, og verðbólga hjaðnar eins og spáð er, ættu forsendur fyrir frekari slökun peningalegs aðhalds að vera áfram til staðar. Má í því ljósi og með hliðsjón af erlendri fjármögnun vænta þess að nefndin lækki vexti bankans áfram á næstunni, en þó með þeim höftum sem áætlun um afnám gjaldeyrishafta fyrir lok efnahagsáætlunarinnar í ágúst 2011 setur vaxtastefnunni. Spáum við því að nefndin verði komin með veðlánavexti bankans niður í 6,0% í lok árs en á árinu eru eftir fjórir vaxtaákvörðunardagar," segir í stýrivaxtaspá Greiningar Íslandsbanka.

• 1 blogg um fréttina

Bloggað um fréttina

• Haraldur Haraldsson: Spá frekari lækkun stýrivaxta/en versnar afkoma sparifjáreiganda neikvæðir vextir,verða til …