Fjárhagslegri endurskipulagningu Icelandair Group lokið

Fjárhagslegri endurskipulagningu Icelandair Group er nú lokið og hafa fjárfestar í heild skráð sig fyrir 5,5 milljörðum króna að markaðsvirði í nýju hlutafé sem jafngildir 2,2 milljörðum nýrra hluta í Icelandair Group.

Félagið tilkynnti í júní, að Framtakssjóður Íslands (FSÍ) og Lífeyrissjóður verzlunarmanna (LV) hefðu gert bindandi samkomulag um að sjóðirnir myndu fjárfesta í Icelandair Group fyrir 4 milljarða króna á genginu 2,5.

Í samkomulaginu skuldbatt FSÍ sig til að leggja fram 3 milljarða króna og eignast þar með 1,2 milljarða nýrra hluta í félaginu. LV skuldbatt sig til að fjárfesta í félaginu fyrir 1 milljarð króna og eignast þar með 400 milljónir nýrra hluta í félaginu.

Samningarnir voru gerðir með fyrirvara um jákvæða niðurstöðu áreiðanleikakönnuna,  um að Fjármálaeftirlitið myndi veita Framtakssjóðnum undanþágu frá yfirtökuskyldu á félaginu og að Icelandair Group myndi safna að minnsta kosti einum milljarði króna að markaðsvirði af nýju hlutafé frá öðrum fagfjárfestum.

Í tilkynningu frá Icelandair Group segir, að búið sé að uppfylla alla þessa fyrirvara.  Samkomulagið miðar við að stærstu lánveitendur Icelandair Group breyti skuldum að fjárhæð 3,6 milljarðar króna í hlutafé miðað við gengið 5, þannig að þeir munu skrá sig fyrir 720 milljón nýjum hlutum. Heildarhlutafjárhækkun mun þannig nema 2,92 milljörðum nýrra hluta að nafnvirði. 

Icelandair Group fyrirhugar að safna u.þ.b 2,5 milljörðum króna til viðbótar í nýju hlutafé. Tilkynnt verður síðar um fyrirkomulag og tímasetningu þess útboðs.

Við fjárhagslega endurskipulagningu fyrirtækisins er gert ráð fyrir að skuldir þess verði lækkaðar um ríflega 10 milljarða króna m.a. með yfirfærslu og sölu á tilteknum eignum sem eru ekki hluti af kjarnastarfsemi félagsins.

• 1 blogg um fréttina

Bloggað um fréttina

• Sigurður Haraldsson: Þarna flugu milljarðar!