Auður Capital tapaði 26 milljónum króna

Tap Auðar Capital nam 26 milljónum á fyrri hluta ársins 2010, saman borið við ríflega 55 milljón króna tap fyrir sama tímabil árið 2009. Tekjurnar jukust um 77% á milli ára og námu 315 milljónum króna.

 Rekstrarkostnaður sama tímabils jókst um 42%.  Eignir í stýringu jukust um 60% frá síðustu áramótum og nema nú 27 milljörðum.

 Þá hefur fjárfestingum á vegum AUÐAR I, sem er fagfjárfestasjóður rekinn af Auði Capital en í eigu 23 fjárfesta, þ.m.t. helstu lífeyrissjóða landsins, fjölgað til muna, en sjóðurinn festi á fyrri hluta ársins kaup á nær öllu hlutafé TALs og Yggdrasils auk þess að kaupa um 20% hlut í Securitas og Gagnavörslunni, samkvæmt vef Auðar. 

Nemur eigið fé Auðar Capital rúmum 1,1 milljarði.  Árshlutareikningur Auðar er aðgengilegur hér