Minnsta verðbólga í þrjú ár

Vísitala neysluverðs miðuð við verðlag í september  er óbreytt frá fyrra mánuði. Vísitala neysluverðs án húsnæðis er einnig óbreytt frá ágúst. Síðastliðna tólf mánuði hefur vísitala neysluverðs hækkað um 3,7% en vísitala neysluverðs án húsnæðis um 4,9%. Þetta kemur fram í frétt á vef Hagstofu Íslands.

IFS Greining spáði 0,3% hækkun vísitölu neysluverðs en Greining Íslandsbanka spáði því að vísitalan myndi hækka um 0,4% frá ágústmánuði.

Fatnaður og skór hækka í verði

Sumarútsölum er víðast lokið og hækkaði verð á fötum og skóm um 5,5% (vísitöluáhrif 0,35%). Kostnaður við rekstur ökutækja lækkaði um 1,2% (-0,11%) og flugfargjöld til útlanda lækkuðu um 11,2% (-0,11%).

Verðhjöðnun síðustu þrjá mánuði

Undanfarna þrjá mánuði hefur vísitala neysluverðs lækkað um 0,4% sem jafngildir 1,6% verðhjöðnun á ári (einnig 1,6% verðhjöðnun fyrir vísitöluna án húsnæðis).

Vísitala neysluverðs samkvæmt útreikningi í september 2010, sem er 362,6 stig, gildir til verðtryggingar í nóvember 2010. Vísitala fyrir eldri fjárskuldbindingar, sem breytast eftir lánskjaravísitölu, er 7.160 stig fyrir nóvember 2010.

• 2 blogg um fréttina

Bloggað um fréttina

• Guðmundur Paul: Ánægjuleg fölsun
• Hervar Gunnarsson: Falsanir