Seðlabankastjóri Kína í heimsókn

Undanfarið hefur viðskiptaafgangur Kínverja við útlönd verið að minnka, en það er ekki markmið kínverskra stjórnvalda að vera með viðskiptaafgang út í það óendanlega, að sögn seðlabankastjóra Kína, Zhou Xiaochuan, sem kom hingað til lands í stutta heimsókn á leið sinni til Bandaríkjanna.

Á blaðamannafundi var Zhou spurður út í ummæli Dominique Strauss-Kahn, yfirmanns Alþjóðagjaldeyrissjóðsins, um að kínverska júanið væri óeðlilega veikt. Zhou svaraði því til að veikur gjaldmiðill hefði hjálpað til við uppbyggingu í Kína, en ójafnvægi milli gjaldmiðla væri óæskilegt og benti á að viðskiptaafgangur Kína hefði farið minnkandi undanfarið. Hins vegar væru fleiri atriði, sem mætti ræða í sambandi við ójafnvægi í alþjóðaviðskiptum en gengi gjaldmiðla.

Zhou sagði að ekki hefði verið tekið til sérstakrar skoðunar hjá kínverskum stjórnvöldum að þau fjárfestu í íslenskum ríkisskuldabréfum, en hann sagði að gjaldeyrisskiptasamningurinn milli Kína og Íslands, sem undirritaður var í sumar, hafi svipuð áhrif og slík kaup. Þá sagði hann að samningurinn gæti gert Ísland álitlegra fyrir kínverska fjárfesta.

• 1 blogg um fréttina

Bloggað um fréttina

• Njörður Helgason: Renndi ÓRG út rauða dreglinum?