Efnahagslegt lestarslys yfirvofandi

Bandaríski hagfræðingurinn Nouriel Roubini, sem oft hefur verið nefndur Doktor Dómsdagur fyrir svartsýnislegar spár sínar um þróun efnahagsmála, segir að útlitið í bandarískum efnahagsmálum sé ekki gott ef úrslitin í þingkosningunum þar í landi á þriðjudag verða eins og skoðanakannanir bendi til. Hefur Roubini m.a. talað um að efnahagslegt lestarslys sé yfirvofandi

Roubini, sem meðal annars spáði fyrir um alþjóðlegu fjármálakreppuna, skrifaði í vikunni grein í breska viðskiptablaðið Financial Times þar sem hann segir að Barack Obama, Bandaríkjaforseti, verðskuldi hrós fyrir að hafa komið í veg fyrir annað samdráttarskeið með því að reyna að örva hagvöxt frekar en skera niður í ríkisrekstrinum. Hins vegar hafi ríkisstjórn Obama ekki gert sér grein fyrir þörfum efnahagslífsins á næstu misserum.

Roubini segir, að verði úrslit kosninganna á þriðjudag eins og kannanir bendi til og repúblikanar nái meirihluta í báðum þingdeildum Bandaríkjaþings, gæti verið framundan langt tímabil stöðnunar og jafnvel verðhjöðnunar í Bandaríkjunum.

Reikna megi með, að repúblikanar felli allar tillögur bandarískra stjórnvalda, sem feli í sér hærri skatta, en á móti muni demókratar stöðva allar þær tilraunir repúblikana til að skera niður ríkisútgjöld.

• 4 blogg um fréttina

Bloggað um fréttina

• Jón Pétur Líndal: Efnahagsleg helför í USA, Evrópu og á Íslandi.
• Sigurður Haraldsson: Það þarf ekki!
• Geir Ágústsson: Rétt spá á röngum forsendum
• Haraldur Haraldsson: Efnahagslegt lestarslys yfirvofandi/ könnumst við nokkuð við svona?????