Stærsta farþegaskip heims sigldi undir Stórabeltisbrú

Farþegaskipið Allure of the Seas sigldi í dag undir brúna yfir Stórabelti í Danmörku á leið frá skipasmíðastöðinni í Turku í Finnlandi, þar sem það var afhent nýjum eigendum í gær, og áleiðis til heimahafnar á Flórída í Bandaríkjunum. 

Aðeins munaði metra, að skipið rækist upp undir búna. En líkt og á systurskipinu, Oasis of the Seas, sem sigldi undir brúna fyrir rúmu ári, er hægt að draga reykháfa skipsins niður líkt og sjónpípur á kafbáti. Þá var skipinu siglt undir brúna á fjöru og á mikilli ferð þannig að það lægi sem dýpst í sjónum. 

Það er útgerðarfélagið Royal Carribean, sem á bæði skipin. Þau eru með 16 þilför, 2700 káetur og 6300 farþegar geta verið um borð í einu auk 2100 manna áhafnar. Í skipinu má finna skautasvell, körfuboltavelli, verkunargötu og kvikmyndasal sem rúmar 1400 manns. Skipin eru 361 metri að lengd og 66 metra breið.

Skipin voru smíðuð í skipasmíðastöð Aker Yards í Turku. Fyrirtækið er í eigu suður-kóreska stórfyrirtækisins STX.  

Allure of the Seas siglir undir brúna

• 1 blogg um fréttina

Bloggað um fréttina

• Sigurður Haraldsson: HRIKALEGT!