Raunvirði eigna Landsbanka eykst

Landsbanki Íslands hf. segir, að auknar endurheimtur á eignasafni bankans á þriðja ársfjórðungi ársins hafi numið 18 milljörðum króna í erlendum myntum frá öðrum ársfjórðungi.

Segir slitastjór bankans, að raunverðmæti eignasafnsins hafi hækkað í erlendum myntum um tæplega 130 milljarða króna frá 30. apríl 2009 til 30. september 2010, eða að meðaltali um tæplega 21 milljarð króna í hverjum ársfjórðungi.

Langstærstur hluti eignasafnsins sé erlendis og því gefi fjárhæðir í erlendum myntum raunhæfan samanburð á virðisaukningu þess. Aðeins rúm 8% af heildareignum bankans sé í íslenskum krónum. Í erlendum myntum séu endurheimtur bankans um 93% af forgangskröfum, en vegna mikillar hækkunar íslensku krónunnar á tímabilinu séu endurheimtur í þeirri mynt áætlaðar 86%
þann 30. september síðastliðinn.

Heildareignir bankans voru metnar á 1138 milljarða króna þann 30. september síðastliðinn en voru metnar á 1100 milljarða króna þann 30. apríl 2009.

„Mjög jákvætt er að reiðufé innheimtist hraðar en fyrri áætlanir bankans gerðu ráð fyrir. Samkvæmt áætlunum bankans í byrjun árs 2010 var gert ráð fyrir að reiðufé næmi um 319 milljörðum króna í árslok sem jafngildir um 286 milljörðum króna á gengi 30. september sl. Reiðufé bankans í lok september sl. nam um 293 milljörðum króna, eða hærri fjárhæð en áætlað var í ársbyrjum að
staða reiðufjár væri í árslok. Af þessu sést að árangur bankans hvað þetta varðar er vel umfram fyrri áætlanir," segir í tilkynningu frá slitastjórninni.

Heimasíða Landsbanka Íslands hf. 

• 1 blogg um fréttina

Bloggað um fréttina

• Ástþór Magnússon Wium: Stálu Landsbankamenn kjötinu? Þeir svara ekki!