Gríðarleg verðlækkun á olíu undanfarið

Heimsmarkaðsverð á olíu hélt áfram að lækka í dag og hefur hráolíuverð lækkað um rúmlega sjö Bandaríkjadali tunnan frá því á fimmtudag í síðustu viku. Þann dag var lokagildi hráolíu það hæsta í New York í tvö ár. Nú nálgast verðið á tunnunni áttatíu dali. 

Svo virðist sem fjárfestar líti fram hjá því að olíubirgðir hafa enn dregist saman í Bandaríkjunum sem er yfirleitt undanfari góðra fregna í efnahagslífinu vestra. Slæm skuldastaða evrópskra ríkja og verðbólguþrýstingur í Kína veldur miklum áhyggjum meðal fjárfesta og skiptir þá meira máli en mögulegur efnahagsbati í Bandaríkjunum.

Í New York lækkaði verð á hráolíu til afhendingar í desember um 1,90 dali í  80,44 dali tunnan. Er þetta 7,37 dölum minna en fékkst fyrir olíutunnuna á fimmtudag.

Í Lundúnum lækkaði verð á Brent Norðursjávarolíu til afhendingar í janúar um 1,45 dali tunnan og er 83,28 dalir. 

• 2 blogg um fréttina

Bloggað um fréttina

• Pétur Óli Jónsson: Heimsmarkaðsverð vs. gengi
• Hörður Sigurðsson Diego: Greinlegt samráð olíufélaganna.