Telja að VBS hafi verið ógjaldfær í byrjun 2008

Slitastjórn VBS telur að bankinn hafi verið ógjaldfær í byrjun árs 2008, 9 mánuðum fyrir hrun og rúmum tveimur árum áður en hann var úrskurðaður gjaldþrota. Eignir félagsins voru verulega ofmetnar. Fyrsti fundur slitastjórnar með kröfuhöfum var haldinn í morgun.

Þetta kemur fram á vef RÚV.

Langstærsti kröfuhafinn í þrotabúi VBS er Seðlabanki Íslands en kröfur hans í búið hljóða upp á 30 milljarða króna sem eru rúm 60% af heildarkröfum. Alls bárust 276 kröfur í þrotabú VBS upp á samtals um 48 milljarða króna. Eignir félagsins eru nú metnar á 10 milljarða.

Hróbjartur Jónatansson, formaður slitastjórnar VBS, segir í viðtali við RÚV að eignirnar hafi verið færðar niður frá bókfærðu virði um tæpa 42 milljarða króna.

Ernst &Young skoða ýmsa þætti í starfsemi VBS fyrir gjaldþrot. Skoðað er hvort undanskot eigna hafi átt sér stað. Til stendur að rifta viðskiptum VBS upp á rúma sjö milljarða króna.

VBS var úrskurðað gjaldþrota í mars á þessu ári og átti þá ekki fyrir launum starfsfólks. Slitastjórnin hefur óskað sérstaklega eftir því að skoðað verði hvenær félagið varð ógjaldfært.

• 1 blogg um fréttina

Bloggað um fréttina

• Heimir Lárusson Fjeldsted: Endurskoðun