Buðu 13,5% Icesave-vexti

Fyrsta tilboð Breta til Íslendinga um endurgreiðsluskilmála á Icesave-kröfunni hljóðaði upp á 13,5% vexti og 10 ára endurgreiðslutíma. Tilboðinu var hafnað. Þetta kemur fram á vef WikiLeaks.

Um er að ræða sendibréf frá Carol Van Voorst, sendiherra Bandaríkjanna hér á landi, dagsettu 8.október 2008. Efni bréfsins er fundur með starfsmanni utanríkisráðuneytisins, Martin Eyjólfssyni. Haft er eftir Martin í bréfi sendiherrans að Bretar hafi boðið áðurnefnda 13,5% við lítinn fögnuð Íslendinga, sem hafi svarað með gagntilboði upp á 6% vexti. Martin nefnir að erfitt yrði að koma þeim tilboðum sem voru upp á borðinu haustið 2008 í gegnum Alþingi.

Einnig er haft eftir Martin að íslenskur almenningur þurfi tíma til að átta sig á umfangi þeirrar kreppu sem hefði skollið á landinu. Martin er sagður hafa verið þrunginn tilfinningum í lýsingum sínum á því hversu svartsýnar allar efnahagsspár fyrir Ísland hljómuðu. Persónulega hefði hann áhyggjur af því hvort framtíð barna hans væri tryggð á Íslandi.