Gengi krónunnar lækkar

Gengi krónunnar hefur lækkað nokkuð það sem af er ári. Frá áramótum nemur lækkunin 1,8% miðað við gengisvísitölu krónunnar. Hefur gengi evru farið á þessum tíma úr 153,8 krónum í 156,6 krónur og krónan því veikst um 1,8% gagnvart evru.

Fram kemur í Morgunkorni Íslandsbanka að breytingin gagnvart Bandaríkjadal sé minni. Hann kostaði 115,1 krónur um áramótin en kostar nú 116,8 krónur sem er hækkun um 1,5% gagnvart krónu.

Íslandsbanki segir, að ekki sé hægt að svara því með óyggjandi hætti hvað hafi valdið lækkun krónunnar undanfarið. Nokkrir þættir komi hins vegar til greina. Kaup Seðlabankans á gjaldeyri sé einn þáttur en bankinn hafi með kaupum sínum undanfarið verið að styrkja þann hluta gjaldeyrisforðans, sem ekki er  fenginn að láni og í leiðinni tekið nokkuð af því takmarkaða framboði sem hefur verið af gjaldeyri. Hlutdeild bankans af veltunni á millibankamarkaðinum með gjaldeyri var 82% á fimm síðustu mánuðum síðastliðins árs eða frá því að bankinn hóf regluleg kaup á gjaldeyri í ágúst.  

Þá segir Íslandsbanki, að væntingar um að afnám hafta sé á næsta leiti kunni að vera önnur skýring á þessari lækkun í gengi krónunnar  en væntanleg áætlun Seðlabankans, Alþjóðagjaldeyrissjóðsins og stjórnvalda um afnám hafta sé  boðuð fyrir lok febrúar.  

• 1 blogg um fréttina

Bloggað um fréttina

• Magnús Sigurðsson: Dollar og evra lækka líka.