Olíuleki gæti náð til Íslands

Olíufélag, sem er að sækja um leyfi til borana vestan við Hjaltlandseyjar, segir að ef svo ólíklega fari að olía leki stjórnlaust úr holunni í tvo og hálfan mánuð gæti olíuflekkurinn hugsanlega borist til Íslands, Noregs og Hollands auk Englands.

Breska fréttastofan Press Association segir að þetta komi fram í umhverfismati sem fylgi umsókn bandaríska olíufélagsins Hess þar sem lagt er mat á hvað gæti farið úrskeiðis. Segi þar að í versta falli kynni olía að leka úr borholunni í tvo og hálfan mánuð þannig að 4,3 milljónir tunna af hráolíu færu í sjóinn.  Líkur á að þetta gerist séu þó afar litlar.

Félagið vill bora í 120 daga í svonefndri Cambo 4 lind um 142 km vestur af Hjaltlandi. PA segir, að bresk stjórnvöld muni taka ákvörðun á næstu mánuðum um hvort leyfið verði veitt.

Grænfriðungar, sem komust yfir umhverfismatið, segja að verið sé að veita olíufélögum boranaleyfi þrátt fyrir þann gífurlega skaða, sem olíuleki geti valdið á umhverfinu.  Bresk stjórnvöld hunsi þann lærdóm, sem dreginn hafi verið af olíuslysinu í Mexíkóflóa sl. sumar.   

„Þetta lítt þekkta fyrirtæki viðurkennir í eigin gögnum, að alvarlegur olíuleki myndi valda því að helmingur bresku strandlengjunnar og stór svæði í Evrópu, yrðu þakin olíu," hefur PA eftir  John Sauven, framkvæmdastjóra Grænfriðunga.

• 1 blogg um fréttina

Bloggað um fréttina

• Ólafur Ingi Hrólfsson: Grænfriðungar sem upplýsingagjafi.