Engar eignir fundust upp í kröfur

Gjaldþrotaskiptameðferð Þáttar International ehf. lauk í þessari viku, en alls var 24 milljarða kröfum lýst í búið. Engar eignir fundust í þrotabúinu.

Þáttur International var að mestu leyti í eigu Milestone, eignarhaldsfélags í eigu bræðranna Karls og Steingríms Wernerssona. Það félag er sem stendur í skiptameðferð.

Bræðurnir Einar og Benedikt Sveinssynir áttu jafnframt um fjórðung hlutafjár í Þætti International, sem var stofnað í aðdraganda stórra viðskipta með hlutabréf í Glitni snemma árs 2007. Í kauphallartilkynningu frá því í febrúar 2007 segir að Þáttur International hafi keypt 9,2% hlut í Glitni, en áður var eign félagsins engin í bankanum.