Viðskipti | mbl | 23.2.2011 | 12:23 | Uppfært 12:41

Moody's: Nei í þjóðaratkvæði sendir ríkið í ruslflokk

Matsfyrirtækið Moody's segir að hafni íslenskir kjósendur Icesave-samningnum muni lánshæfismat íslenska ríkisins að öllum líkindum fara í ruslflokk og fá einkunnina Ba1. Samkvæmt fréttatilkynningu frá Moody's myndi samþykki samningsins að öllum líkindum leiða til þess að matsfyrirtækið mæti horfurnar stöðugar.

Fram kemur í fréttatilkynningu Moody's að nýi Icesave-samningurinn leiði til þess að skuldastaða íslenska ríkisins og geta þess til að standa undir skuldunum. Að gefnum forsendum muni skuldastaða ríkisins ná hámarki í ár og verða um 100% af landsframleiðslu í stað 115% eins og áður hefur verið talið. Samkvæmt sömu forsendu myndi skuldastaðan verða komin í 72% árið 2015. Ennfremur telja sérfræðingar Moody's að lausn Icesave-deilunnar myndi auðvelda aðgengi að erlendum fjármagnsmörkuðum og flýta fyrir afnámi hafta.

Hinsvegar er skýrt tekið fram í mati Moody's að mikil óvissa ríki um ofangreint. Forsendur um gengisþróun og endurheimtur úr þrotabúi Landsbankans kunna að reynast bjartsýnar. Einnig er nefnt að niðurstöður í ýmsum dómsmálum sem nú standa yfir kunni að hafa neikvæð áhrif á stöðu íslenska ríkisins og einkageirans.

Einnig er bent á að afnám hafta kunni að flækjast vegna áhrifa á gengisþróun og fjármögnun ríkisins og einkageirans. Auk þess er bent á að ákveðin áhætta felist í stöðu íslenska bankageirans um þessar mundir.

Ástæðan fyrir að Moody's segist að öllum líkindum lækka lánshæfismatið ef Icesave-samningurinn verður ekki staðfestur er sú að slíkt myndi sennilega seinka greiðslum á lánum Norðurlandaþjóðanna auk þess sem að það gæti seinkað framgangi efnahagsáætlunar Alþjóðagjaldeyrissjóðsins. Ennfremur myndi slíkt einnig framlengja gjaldeyrishöftin.