Svipuð landsframleiðsla og 2005

Landsframleiðsla á árinu 2010 nam 1540 milljörðum króna en það er 44 milljörðum eða 3% hærri fjárhæð en árið áður. Að teknu tilliti til verðbreytinga dróst landsframleiðslan saman að raungildi um 3,5% samanborið við 6,9% samdrátt árið áður.

Þetta kemur fram í nýjum tölum frá Hagstofunni, sem segir, að ef árið 2009 er undanskilið sé  þetta mesti samdráttur landsframleiðslu, sem mælst hafi frá árinu 1968, en þá nam samdrátturinn 5,5%. Landsframleiðsla á liðnu ári nemur svipaðri fjárhæð að raungildi og landsframleiðsla ársins 2005.

Að teknu tilliti til fólksfækkunar, sem nam 0,4%, dróst landsframleiðsla á mann saman að raungildi um 3,1% árið 2010 en hafði árið áður dregist saman um 6,9%.

Einkaneysla sem hlutfall af landsframleiðslu var 50,8% á liðnu ári. Hagstofan segir, að í sögulegu samhengi sé þetta hlutfall mjög lágt síðustu þrjú árin. Samneyslan sem hlutfall af landsframleiðslu var 25,9%. Síðastliðin níu ár hefur þetta hlutfall verið hærra en nokkru sinni fyrr.

Hlutfall fjárfestingar af landsframleiðslu var tæplega 13% á liðnu ári og er það hlutfall nú í sögulegu lágmarki. Sambærilegt hlutfall fyrir OECD ríkin í heild hefur verið um eða undir 20% undanfarinn aldarfjórðung. Að raungildi var fjárfestingin á síðasta ári svipuð og árið 1996, að sögn Hagstofunnar.

Landsframleiðsla ársins 2010

• 2 blogg um fréttina

Bloggað um fréttina

• Geir Ágústsson: Ríkisvald 2011 verði að ríkisvaldi 2005
• Viggó Jörgensson: En þjóðartekjur eins og árið 2000