Ofurríkir fá afslátt af landvistarreglum

Samkvæmt nýjum innflytjendalögum sem kynnt verða af bresku ríkisstjórninni í dag munu erlendir fjárfestar sem eru tilbúnir til þess að geyma fimm milljónir punda, andvirði tæps milljarðs íslenskra króna, á breskum bankareikningi fá rétt til dveljast varanlega í landinu eftir aðeins þrjú ár. Allir aðrir innflytjendur þurfa að bíða í fimm ár til að öðlast þann rétt.

Erlendir fjárfestar sem eru reiðubúnir að geyma tvöfalda þá upphæð á Bretlandi öðlast réttindin enn fyrr eða eftir aðeins tvö ár. Það sem meira er þá er sá tími sem þessir ofurríku innflytjendur geta eytt utan landssteinanna tvöfaldaður, úr 90 í 180 daga, án þess að það skerði rétt þeirra á varanlegu landvistarleyfi. Breska blaðið The Guardian segir frá þessu á vefsíðu sinni í dag.

Damian Green, innflytjendaráðherra landsins, mun kynna lögin í kauphöllinni í Lundúnum í dag. Þykja ákvæðin um hina vellauðugu innflytjendur vera í töluverðri mótsögn við fyrirætlanir stjórnvalda um að taka rétt til landvistarleyfis af þeim sem koma til Bretlands til að læra eða vinna tímabundið.

Í lögunum er einnig gert ráð fyrir ívilnunum til erlendra atvinnurekenda. Fá þeir landvistarleyfi innan þriggja ára ef þeir hafa skapað tíu störf í landinu eða náð árlegri veltu upp á andvirði tæpra tveggja milljarða króna hjá breskum fyrirtækjum sínum. Er þetta gert til þess að laða að sprotafyrirtæki sem falla ekki undir önnur ákvæði laganna.

• 1 blogg um fréttina

Bloggað um fréttina

• Ragnar Kristján Gestsson: Money talks - bullshit walks