Viðskipti | mbl | 5.4.2011 | 9:42 | Uppfært 11:45

N1 yfirtekið af kröfuhöfum

N1 hefur verið tekið yfir af kröfuhöfum. mbl.is/Ernir

Arion banki, Íslandsbanki og meirihluti eigenda skuldabréfa á N1 hf, stjórn og stjórnendur N1, Umtaks og BNT hafa komist að samkomulagi um að rekstur félagsins verði tekinn yfir af lánardrottnum.

Þetta kemur fram í fréttatilkynningu frá stjórnarformanni N1, Einari Sveinssyni. Samkomulagið felur í sér að meirihluta skulda félagsins verði breytt í hlutafé. Eigið fé BNT og Umtaks verður neikvætt í kjölfar samkomulagsins og eru örlög þeirra félaga óráðin.

„Aðkomu fráfarandi eigenda að N1 má rekja til þess þegar hópur fjárfesta undir forystu Bílanausts hf. keypti Olíufélagið ehf. í febrúar 2006. Við kaupin var stofnað eignarhaldsfélagið BNT hf. sem hélt utan um eignarhlutina í Bílanausti hf. og Olíufélaginu ehf. Hluthafar BNT hf. voru á þriðja tug talsins og lögðu þeir 10,2 milljarða króna til félagsins í formi hlutafjár. Fasteignir Bílanausts hf. og Olíufélagsins ehf. voru samhliða þessu færðar yfir í sérstakt fasteignafélag ‐ Umtak fasteignafélag ehf. Í apríl 2007 voru Bílanaust hf. og Olíufélagið ehf. sameinuð í eitt félag – N1 hf. Við þá sameiningu varð til nýtt og kraftmikið verslunar‐ og þjónustufyrirtæki með yfir 600 starfsmenn og 115 þjónustustaði um allt land,“ segir meðal annars í tilkynningunni.

Reiknað er með því að fjárhagslegri endurskipulagningu N1 verði lokið í sumar. Núverandi stjórn mun sitja þangað til endurskipulagninu er lokið, að ósk lánardrottna.