Viðskipti | mbl | 5.4.2011 | 11:44

Segir mat AGS hafa breyst

Gunnar Tómasson hagfræðingur

Mat Alþjóðagjaldeyrissjóðis (AGS) á því hvenær skuldastaða þjóðarbúsins reynist ósjálfbær hefur breyst nokkuð frá fyrsta mati sjóðsins í nóvember 2008. Þetta kemur fram í bréfi sem Gunnar Tómasson, hagfræðingur, sendi þingmönnum í dag.

„Upplýst atkvæðagreiðsla um Icesave nk. laugardag krefst þess að stjórnvöld komi hreint til dyra varðandi efnahagsþróun og horfur. Upplýsingar hér að neðan koma íslenzkum stjórnvöldum ekki á óvart þar sem þær eru byggðar á skýrslum AGS. Ef þær koma lesendum á óvart, þá er upplýsingamiðlun stjórnvalda ekki jafn virk og æskilegt væri í aðdraganda þjóðaratkvæðagreiðslu um Icesave,“ segir í bréfi Gunnars til þingmanna.

Bendir hagfræðingurinn á að i nóvember 2008 hafi AGS metið það sem svo í skýrslu sinni um Ísland, að erlend skuldsetning sem næmi 240% af vergri landsframleiðslu væri augljóslega ósjálfbær (e. clearly unsustainable). „Í reynd varð hlutfallið 308%, og AGS lýsti það vera sjálfbært,“ segir Gunnar í bréfi sínu.

„ Mat AGS á þróun og horfum varðandi landsframleiðslu á tímabilinu 2009-2013 hefur einnig breytzt mjög til hins verra. Í stað þess að VLF á árinu 2013 verði 2-3% hærri en 2008, þá er það núna mat AGS að VLF verði 2-3% lægri. Í krónum jafngildir þetta að VLF árið 2013 verður allt að ISK 90 milljörðum lægri en áætlað var í nóvember 2008. Fyrir tímabilið 2009-2013 í heild kann VLF að vera e.t.v. ISK 200-300 milljörðum minni en áður var áætlað,“ segir Gunnar.

Undir lok bréfsins segir Gunnar að fyrstu viðbrögð hans við þeim Icesave-samningi sem kosið verður um næstu helgi hafi verið góð. Hins vegar hafi hann ekki gert upp hug sinn fyrr en hann hafi haft tækifæri á að gera samanburð á mati AGS á horfum í íslensku efnahagslífi eins og þær voru settar fram í skýrslum AGS frá nóvember 2008 og aftur í janúar 2011. „

Ofangreindar niðurstöður úr þeim samanburði benda ótvírætt til þess að langtímahagsmunir íslenzku þjóðarinnar verða bezt tryggðir með NEI atkvæði kjósenda 9. apríl,“ segir hagfræðingurinn.