Atvinnuleysi áfram 8,6%

Skráð atvinnuleysi í mars var 8,6%, en að meðaltali 13.757 manns voru atvinnulausir í mars. Var atvinnuleysi óbreytt frá febrúar. Vinnumálastofnun áætlar að atvinnuleysið í apríl minnki og verði á bilinu 8,1%-8,5%.

Körlum á atvinnuleysisskrá fækkaði um 77 að meðaltali eða um 0,1 prósentustig að meðaltali en konum fjölgaði um 62 að meðaltali. Atvinnulausum fjölgaði um 68 á höfuðborgarsvæðinu og um 14 á Suðurnesjum. Annars staðar fækkaði lítilsháttar á atvinnuleysisskrá.

Atvinnuleysið er 9,2% á höfuðborgarsvæðinu en 7,5% á landsbyggðinni. Mest er  það á Suðurnesjum 14,5%, en minnst á Norðurlandi vestra 3,9%. Atvinnuleysið er 9,2% meðal karla og 7,8% meðal kvenna.

Alls hafa 8189 veri atvinnulausir lengur en 6 mánuði og fjölgaði þeim um 527 frá lokum febrúar. Þeim sem verið hafa atvinnulausir í meira en eitt ár fjölgaði úr 4820 í lok febrúar í 4837 í lok mars.

Alls voru 2741 á aldrinum 16-24 ára atvinnulausir í lok mars en 2722 í lok febrúar eða um 18% allra atvinnulausra í mars og fjölgar um 19 frá því í febrúar. Í mars 2010 var fjöldi atvinnulausra ungmenna 3147.

Alls voru 217 laus störf hjá vinnumiðlunum í lok mars sem er 19 störfum fleiri en í febrúar, þegar þau voru 198. Flest laus störf eru þjónustu, sölu – og afgreiðslustörf eða alls 69.

Skýrsla Vinnumálastofnunar

• 2 blogg um fréttina

Bloggað um fréttina

• Páll Höskuldsson: Skráð atvinnuleysi gefur ekki rétta mynd.
• Magnús Óskar Ingvarsson: Vaxandi atvinnuleysi